Para iso, cómpre ter en conta as necesidades de apoio aos colectivos máis vulnerables, ás persoas migrantes, sen fogar e soas, así como a educación contra a LGTBIfobia e a transfobia e con perspectiva de xénero e interxeracional. Uns aspectos que se deben garantir a través do reforzo das políticas sociais, coa optimización dos recursos sociosanitarios dispoñibles, a corresponsabilidade e a conciliación ou a saúde mental da poboación.

Por outra banda, salientouse a importancia de recuperar o sentimento identitario, algo que debe pasar por un reforzo colectivo e inclusivo, no que a política económica, social e educativa vaian da man, na procura dunha igualdade real entre todas as persoas. Neste senso, falouse sobre as posibilidades de retorno das persoas egresadas da USC que non traballan no territorio; a xeración de emprego para a mocidade; a silver economy; as tarxetas moedeiro; a simplificación das licenzas produtivas para o rural; o problema do acceso á vivenda e a convivencia coas vivendas turísticas. Ademais, deberanse salvar as dificultades da trama urbana para a integración social dos barrios e a adaptación dos espazos públicos para que sexan seguros e accesibles.