Unha das principais eivas que se detecta no eido da mobilidade e do transporte é a excesiva dependencia do automóbil privado, especialmente nos casos dos desprazamentos desde os municipios lindeiros de Ames e Teo. Ademais, a diversidade de orixes nos desprazamentos a Compostela dificulta a dotación de transporte público en extensas áreas do territorio municipal e metropolitano. Esta situación deriva en problemas de conxestión do tráfico e de dificultades para atopar estacionamento na cidade.

Por contra, Santiago dispón dunha estación intermodal ben localizada e que facilita o acceso á cidade desde distintos puntos, sendo tamén chave no eixo atlántico ferroviario galego. A isto cómpre sumar que a cidade é compacta e facilita o tránsito peonil, polo que permite reforzar a peonalización da urbe, complementándoo cunha rede de aparcadoiros disuasorios.

Por outra banda, a optimización do servizo do transporte público ten entre as súas ferramentas a existencia dunha empresa municipal de transporte e de instrumentos para establecer sinerxías cos municipios da periferia. Ademais, a localización dos novos solos de actividade empresarial tamén precisan dunha rede de transporte público que facilite os desprazamentos a estas áreas.