O excesivo peso do sector servizos fronte ao industrial ou ao case inexistente primario e a dependencia de grandes empresas dentro de sectores maduros en Santiago fai preciso botar man da innovación. Para isto, o talento procedente da Universidade resulta chave para diversificar a actividade económica. Ao tempo, aproveitar a situación xeográfica e a condición de capital de Galicia para atraer maior número de empresas. Tamén o crecente interese polos alimentos km 0 pode axudar a promover un sector agrario case inexistente no municipio.

Afondar pois nas políticas de apoio á diversificación da base económica da cidade dando continuidade á liña aberta no marco do Pacto pola Sionlla por proxectos como o Spin Up , Bioincubatech  ou Biotecnia Polo Biotecnolóxico de Galicia será un elemento fundamental para construír un modelo económico máis equilibrado.  A colaboración establecida para este obxectivo entre Instituto Galego de Vivenda e Solo (IGVS), o Instituto Galego de Promoción Económica (IGAPE),a Axencia Galega da Innovación (GAIN),  o Concello de Santiago de Compostela, A Universidade de Santiago de Compostela, a Asociación Área Empresarial do Tambre e a Cámara de Comercio de Santiago de Compostela e os clústers de biotecnoloxía BIOGA e da saúde CSG, é un exemplo de colaboración público-privada que se pode aplicar á promoción de outras iniciativas semellantes.

Por outra banda, Santiago salienta por contar cunha marca turística diferenciada, se ben as persoas visitantes soen concentrarse na cidade central. Isto provoca problemas de convivencia con residentes, correndo o perigo da turistificación do destino. Ademais a extensión da tempada alta derivou nun conflito entre as necesidades de aloxamento de estudantes e de visitantes. Neste senso, cómpre aplicar medidas para promover unha axeitada convivencia de ambos aspectos.

É por iso que se pode botar man do territorio ambiental e patrimonialmente interesante da periferia rural de Santiago para levar a cabo estratexias de desconcentración e descentralización do turismo. Do mesmo xeito, e dado o número de cooperativas residenciais existentes poderían servir de panca para implantar novas políticas de vivenda que fagan fronte á conversión de vivendas en aloxamentos turísticos.