A análise neste eido pon de manifesto a existencia dunha ampla porcentaxe de vivenda baleira, e cunha capacidade limitada por parte do Concello para intervir no mercado inmobiliario, tras a desaparición da empresa municipal de vivenda. Porén, si existe a posibilidade de mobilizar eses inmobles baleiros para mellorar o acceso aos mesmos, reforzando estas accións con programas de axuda á rehabilitación e renovación do parque residencial. Ademais, existe solo urbanizable, ben conectado coa cidade existente, que pode servir para desenvolver novas políticas neste eido.

Por outra banda, a progresiva carestía dos prezos de alugueiro e a inexistencia dun parque público para este tipo de inmobles levan ao éxodo a municipios lindeiros. Ademais, os novos modelos de familia, máis cambiantes e con menos integrantes, fai difícil a adaptación do parque de vivendas existente ás súas necesidades. Sen embargo, o Concello conta cun solo edificable residencial que podería ser a base para un parque de vivenda de alugueiro.

Relacionado co fenómeno da turistificación, ponse de manifesto a problemática do dobre uso das vivendas para visitantes e estudantes. Unha situación que se podería xestionar grazas á capacidade do Concello e da súa equipa técnica para a xestión do solo en desenvolvemento das previsións contidas no planeamento urbanístico.